Ieu carita kalakonan sababaraha waktu katukang. Sim kuring, maseko sakulawargi, Chau, Elung, Soleh, Akber. Dimimitian ku kahayang hate ngumpul ngariung jeung dulur-dulur nu biasa baheula kalakonan sanajan lain ditempat nu nyingkur dilembur batur siga waktu mangkukna, katambah-tambah ku kasono kadaharan nu biasa aya dipilemburan, ngebulna sangu nu haneut, seungitna beuleum asin Peda, melenghirna sambel tarasi nu digoreng, empukna pais lauk emas, segerna lalaban kaasup bauna peuteuy nu geus kakoncara kamana-mana (LOL) Hanjalkalna mung teu aya sayuran, teu ninggali hideungna hampas kecap, teu nyampakna sop buntut nu haneut (doh).

Lembur nu yingkur, naratay ku ngajajarna saung-saung leutik tempat pangjugjugan urang kota nu sono ka hawa tur kadaharan lembur, taya lian eta tempat teh Punclut hmm…Disebut Punclut sigana pedah eta tempat ayana diluhur gunung. Punclut sarua jeung puncak, padahal nyatana mah eta tempat teh teu dipuncak gunung pisan, cukup dijugjug kusababaraha menit oge nepi.

Nu lian mun ngajugjung ka eta tempat biasana jalan nuturkeun tanjakan nu aya, jadi satepina di tempat tujuan ngarasa cape nu ngaakibatkeun rasa lapar oge lumayan karasa, tungtungna ngarasa nikmat daharna. Lain deungeun-deungeun lain kuring, da kuring mah tara kitu, masih keneh nempel pamalesan ngagerakeun waragad teh, biasana langsung ngajugjug katempat nu dituju tur langsung gek diuk, celebek dahar haha….

Sakali-kali mah sigana hayang deui ngajugjug kaditu. Tapi teu resep oge ngajugjug kaditu ari nyorangan mah, kudu badami heula jeung balad-balad atawa balarea sugan wae aya keneh nu mikasono kana kaayaan alam tur kadaharan pilemburan kusabab keur jalma nu muja kana kadahareun modern mah moal aya pikabitaeunnana

Endahna alam nu masih karasa jeung kabawa-bawa dina pikiran, sanajan mung saukur ngarasakeun sarintakan, eta teh bener-bener lain saukur carita. Lembur leutik nu katinggali walagri sanajan jauh tina kamewahan nunjukeun eta tempat adem tentrem, gemah ripah lohjinawi haha… (meureun eta oge, da teu apal ari kahirupan sapopoe eta lembur) Mung saukur kirata, dikira-kira sugan nyata

Memang ku wanci kiwari mah lamun teu bisa nuturkeun jaman mah bener-bener katinggaleun pisan. Boh tina informasi atawa nu sejena akibat pesatna kamajuan teknologi. Hal eta bisa ditinggali dina parobahan-parobahan nu aya di sabudeureun tempat mondok moek nu taya lain nyaeta imah (ngaku-ngaku boga imah padahal henteu haha..).

Nu sabenerna mah apal mah apal ketah kana tempat tujuan harita teh, mung can pernah nincakeun suku ditempat eta ku ayeunakeun (baheula mah nya kasebut sering oge tapi tacan robah sagala rupana) akibat ieu indung suku hese pisan dilengkahkeunnana keur sakadar ulin ngaler ngidul, bener-bener asa siga paribasa “beurat ku bujur” harese rek incah kamana-mana.

Teu pira tujuan ka eta tempat teh mung sakadar rek lalajo, dahar jeung ngopi asalna, tapi sanggeus rengse eta kabeh niat aya tambahanana; “hayu urang jojorowokan” celetuk salah sahiji babaturan teh, nyebutkeun ngahaleuang mah kurang pantes sigana da teu ahli kekek.. Ujung-ujungna ulin nu diniatan sakeudeung teh jadi lumayan lilana oge, mimiti jam dua beurang tungtungna nepi ka peuting ngan saukur lalajo, dahar, nongkrong jeung nangkring di eta tempat. Kunaon bet asa linglung? Sanajan teu wakca balaka (ngan saukur dina jero hate) sabenerna kuring pernah ngarasakeun aya saeuting rasa kalinglung, asa tempat deungeun-deungen kusabab geus lila tara ulin atawa nangkrang-nongkrong kitu heuheu…

Saur beja (duka ti saha-saha na mah, tapi sanes panginten beja ti jurig mah) , carita asal muasalna tahu Sumedang teh kawitna ti karajinan kulawarga Ongkino, nu ngarintis ide asalna kanggo ngadamel Tou Fu (dari basa Tionghoa nu hartosna sami) nu lami-lami robih nami janten “Tahu”. Tahun ka tahun, Ongkino sareng bojona nu dipika deudeuh teras mayunan usahana dugi ka tahun 1917 putra samata wayangna (Ong Bung Keng) nyusul ka tanah Sumedang. Saterasna Bung Keng neraskeun usaha sepuhna dugi ka sepuhna milih balih deui ka lemah cai tanah kalahiranna nyaeta di Hokkian, Republik Rakyat Cina. Ong Bung Keng, putra tunggal Ongkino, neraskeun usaha warisan eta dugi tuntung hirupna dina yuswa 92 tahun. Tah tidinya carita ngenaan nu ngarintis ngadamel tahu Sumedang teh.

Salian tahu Sumedang, nu kasohor tuangeun nu tiasa dijantenkeun oleh-oleh ti Sumedang aya deui nyaeta hui (Ubi) Cilembu, nu ngajantenkeun remen bobos alias hitut tea sareng nu bakal ngajantenkeun bauna eta saurna mah heuheu… Rasa tur ciri-cirina gaduh bedana ti hui-hui sejenna. Hui Cilembu asalna nya ti daerah Cilembu Sumedang lah kekek… Upami tos di pasak (dibeuleum ku open biasana) katinggalna jiih tur jegang sapertos madu nu aya dina eta hui, pami di raosan amis pisan. Saur beja oge, upami binih eta hui di pelak di tempat sanes hasilna moal sami siga hui Cilembu, hasilna pasti sapertos hui nu biasa, hal eta panginten nu janten daya tarik eta hui janten kakoncara sareng mikaresep.

Panasaran ku tahu sareng hui Cilembu! Mangga dongkapan daerah Sumedang, pasti mendakkan nu di pikahoyong

kecap-kecap eta teh biasana norojol kitu wae, biasa mucunghulna mun suasana urang keur gamblang, teu tiasa ngawujudkeun pamadegan urang sateuacanna kanggo ngaimbangan kaayaan nu dipiharep kunu lianna. Hal eta teh biasana malah ngajantenkeun kalinglung ka urangna tur nambah kabingung, duh eta pisan nu nuju kasorang di wanci kiwari ku sim kuring teh . Kumargi kitu, ieu seratan teh cekap sakieu heula, mung sakadar ngeusi wae ieu blog da makna na mah jelas teu aya kekekek. Cag ah.

Abdi sarengrengan tadi ngaraos kacida pisan bingahna kumargi aya hiji wargi kersa breh-brehan dina ngabagi rizkina kanggo buka saum dinten tadi. Sadaya nu kempel tadi tiasa diyakinkeun teu aya sajalmi oge nu ngaraos nyesel komo deu dugikeun ka sumutut tur jamedud mah ku kameumeut atanapi kadeudeuh hiji wargi eta, anjeuna sakedik ge teu gaduh sifat ngepel kana banda, kayungyun pisan keur mah geulis camperenik, jangkung lenjang, ah pokonamah carogena pasti kacida bagjana ngengingkeunnana. Kayungyun, someah, komo mun tos imut ngagelenyu katinggal pisan kasomeahannana.

Eta hajatan buka sasarengan teh di ayakeun di “Roemah nenek” nu aya di daerah Taman Cibeunying. Dina ngawujudkeun eta hajatanana dibantosan ku wargi caket abdi oge nyaeta Maseko. Nya akhirna kawujudkeun alias janten kanyataan tur ngabalareakeun ka sadayana nu dongkap.

Nu aya dina eta hajatan tadi lumayan seueur, diantawisna Kang Amal, Cep Ihwan, Mas Narapandita, Jang Adit, Neng Fathinanjani, Ceu Sireum sareng nusanesna nu teu tiasa disebatkeun hiji2. Mung aya sakedik hanjakalna, abdi rada telat dongkapna ka eta hajatan kumargi mayunan tamu heula nu ahirna teu nyandak alat kanggo pengemut-ngemut mangrupa dokumentasi. Tapi teu sawios da nu lian aya nu nyandak kanggo juprat-jepret mah.

Dina akhir carita, abdi sareng wargi-wargi nu sanesna mung tiasa ngahaturnuhunkeun ka kasomeahan. Teu hilap ngadu’a mugi2 aya kalanggengan laki-rabina, dipanjangkeun yuswana tur di gampilkeun rizkina, Amin.

Nu gaduh hajat sih moal ngaos ieu seratan kumargi teungartoseun

Cag ah….

Tos opat dinten abdi mondok moek dinu poek heu… pikaserieun pisan ieu lengkah indung suku teh nya, tapi hate mah ngrasa yakin ieu aya faedah nu bakal kasorang dina sagala pangharepan nu di seja, amiin.

Seratan ieu memang sajedik oge teu aya naoonya istilahna? maksukna teu aya makna nu di candak didieu mung sakadar ngesi postingan nu tos lami teu di lebetan.

Ngarujuk ka mimitran ieu carita hirup ngalalana mere beja ka balarea, heu.. siga nu sok aya ni ninggal wae nya (ah teu nanaon ambon sorangan wae lah hik…), yen sim kuring ayeuna mayunan kahirupan anyar dina rangka ngalalana keneh. Anyarna eta ngan khusus dina lembur nu di tincak, lain anyar dina nu sanesna. Lengkah ieu pinuh pisan ku pangharepan susugan dina babak ieu mah manggih kawalagrian, amiin. Sakitu carita sim kuring nu kasebatna nuju rungsing pusing tapi masih tiasa keneh nyengir heu.. cag ah permios.

Hiji wanci nu mustari, satepina di dayeuh eta kajaiban ngadatangan dirina. Si Ujang teu pisan nepi kaluntang-lantung sisi jalan kusabab langsung manggih pagawean nu kacida ngabangjakeunnana. Ti harita Ujang teh soson-soson nyanghareupan eta pagawean nu aya.

Sangeus sabaraha waktu di lakonan, hiji mangsa Ujang teh boga niat hayang boga usaha sorang. Tina ku rikrikna kukumpul modal salila digawe akhirnya jadi kanyataan eta kahayang. Alhasil Ujang teh boga usaha.

Usaha ujang kasebut manggih jalan nu lancar. Tapi kalancaran eta teu kungsi lila manggih panghalang ku ayana sababaraha jalma nu teu tanggung jawab, akibatnya nya kapaksa Ujang teh kudu nanggung resikona. Cek cek cek ….. sakitu badagna eta nu di tipu kanu lian teh. Ujang mung bisa ngerutkekeun tarang da teu walakaya.

Ujang teh sabenerna mah geus nerangkeun sagalana ka nu aya kakaitan jeung usahana, tapi pedah tea mah ujang teh jalma leutik meureunan jadina masih loba nu teu hayang ngarti kana eta kaayaan Si Ujang teh.

Carita si Ujang awalna bet eureun tina usaha manehna aya maksud meh teu loga teuing karieut ku hutang nu terus nambahan, nya paling-paling hutangna sakitu wae anger teu ngagedean mun eureun tina usaha. Keur mayarna paling neangan usaha nu lain.

Mapag carita, hiji wanci aya nu nawaran keur ngabedah eta masalah nyaeta Ujang kudu aya usaha deui. Jalma nu nawaran usaha memang aya pakuat-kaitna jeung usaha Ujang nu tiheula. Mhhh… kacida bagjana Ujang harita. Naon wae nu dititah ku jalama eta dilakonan, ti mimiti neangan tempat jeung sagalanana dilakonan sanajan kudu kukurilingan ngaluarkeun ongkos keur kaditu-kadiena, tapi Ujang tetep sumanget ngajalankeuna padahal sakabehna apal sorangan Ujang teh harita teu boga nanaon pisan alias harta teu boga, banda teu aya. Ngan ukur boga bekel sumanget jadinya but-bet minjem duit kaditu-kadieu keur ngajalankeun eta maksud. Nya teu nanaon lah da ceuk rarasaan mah eta teh bakal aya wujudna alias nyata hasilna.

“Pucuk di cinta ulam pun tiba” mun ceuk paribasa Indonesia mah, tapi naon keunana eta babasan ka carita Si Ujang. Nu aya malah sabalikna, eta teu aya buktina, waktu geus samporet tapi kanyataan can torojol wae, nu akhirna mung bisa bati gogodeg mukiran kana nasib diri. Maksudna mah usaha eurueun ti nu baheula teh hayang teu nambahan hutang tapi geunangan kakara boga rencana ge, kalahka nambahan terus akibat ku nu rek mere modal ngan ukur sakadar ngaheureuyan. “Kitu geuningnya mun jadi jelema beunghar bari jeung teu ngarti ku kaayaan jalma leutik, kaayaan nu sakieu peurihna ditambah ku kapeurih anyar, jadi jalma leutik tur kapeuncit” ceuk Ujang.

Seratan eta blog asa leres-leres pisan ngenaan kana manah, da memang karaos – katinggalna ku abdi mah eta seratan kagungan hartos sareng manfaat tur faedah nu sae pisan. Kieu seratannana (punten abdi nyalutak kumargi teu nyuhunkeun ijin nyomot ieu seratan sateuacanna, kanggo nambihan wacana ieu blog mugi-mugi tiasa ngareuah-reuah blog nganggo basa sunda he…):

Paralun, lain rek nambahan ketir kaayaan nu geus matak ketir. Ngan dalah dikumaha, loba nu nyebutkeun yen kaayaan saperti nu kalaman ku urang ayeuna teh cenah memper-memper kana ciri-ciri geus deukeut kana kiamat. Tapi soal eta mah teu kudu jadi hoghag parea-rea omong, sabab nu leuwih penting mah urang kudu mikiran kumaha carana pikeun ngungkulan masalah nu jiga teu eureun-eureun. Puncakna basa harga BBM ditaekkeun. Geus kajudi, mun harga BBM naek, hahargaan nu sejen oge pasti naek. Sembako, ongkos angkutan, biaya sakola, kabeh nararaek. Ra’yat ngajerit!

Keur jelema nu baleunghar, nu salieuk beh (sanes salieuk ‘bibeh’), tangtu hal ieu teh moal pati jadi masalah. Tapi pikeun kalolobaan ra’yat Indonesia, ieu teh mangrupa masalah anu gede kabina-bina. Keur mah samemeh BBM naek oge ngawaragadan hirup teh geus seuseut seuat, ari pek teh ayeuna harga BBM ditaekkeun pisan. Moal boa hirupna teh geus jiga jelema teu eling. Digawe cek paribasana suku dijieun hulu, hulu dijieun suku, tipoporose nyiar kipayah, ari hasilna teu sabaraha. Boro-boro nyukupan kana kabutuh sapopoe, dalah jang maraban anak pamajikan oge geus seuseut kacida. Can nepi kana nyukupan ku dahareun opat sehat lima sampurna, dalah sangkan anak pamajikan sareubeuheun oge can nepi. Sual baju jeung nyakolakeun mah komo, beuki dipikiran kalah beuki lendeng kana sirah, bakat ku bingung ti mana neangan tambahan panghasilan.

Rek korupsi, mana korupsieunana. Manasina pejabat atawa anggota DPR anu loba liang pikeun korupsieun, salian ti setoran matuh ti pengusaha teh. Ra’yat leutik mah boro-boro. Awak kuru ngabelaan sakopeun saameun, anak kurang gizi, pamajikan boro-boro bisa dangdan, da ti mana waragadna. Geus kacipta, cape balik gawe, datang ka imah nenjo pamajikan kusut, anak rarugi hayang dahar, boro-boro matak hegar kana pikiran. Nu katenjo sapopoe teh istuning ngan ukur kasusah jeung karudet. Benten sareng juragan nu di DPR. Eta geuning Max Moein oge mani kaboro ngalambangsari sagala rupa jeung awewe nu lain muhrimna. Sugan teh jelema eusleum mah teu bisa jadi anggota DPR. Singhoreng bisa geuning. Jaba, boa-boa lain ngan manehna nu boga lampah nirca jiga kitu teh. Boa ampir kabeh. Naudzubillahi mindzalik!

Tetela Indonesia teh gering! Sasalad mental mahabu. Pamingpin ongkoh-ongkoh dina dunyana sorangan, ngitung bati korupsi bari mikiran ka mana ngawurkeun duit poe ieu. Naha ka si neneng anu rancunit, atawa balanja ka Singapur bari api-api aya tugas nagara: studi banding tea, itu tea, ieu tea? Ra’yat nu ngajerit ampir euweuh soraan teu dipalire, sabab ceuli maranehanana geus puguh nyocokan. Aman, moal ngadenge nanaon. Matana lolong bonconong nepi ka teu nenjo jelema-jelema sakarat alatan lapar! Nu katenjo ngan ukur piduiteun jeung piduiteun, pikeun nyumponan kahayang sungut jeung kahayang si eta. Mun pamingpin geus kitu patut, tong ngarepkeun nagara bisa walagri, jajauheun kana adil ma’mur palamarta.

Hawar-hawar kadenge nu gelo gogorowokan di luar, “Pamingpin gelo, pamingpin edan, pamingpin teu belul ngurus nagara! Teu geura datang atuh Ratu Adil teh, Gustiiiii…!!!”

Kuring ngahuleng bari mikir. Boa enya para pamingpin teh sarua eusleumna jeung nu keur gogorowokan di luar… Boa-boa!

Nu kirang nyenengkeun di daerah eta nyaeta bau belerang nu kanggo sapalih jalmi mah tiasa ngakibatkeun batuk-batuk kusabab ngangseu bauna, bahkan teu tebih ti tempat wisata kawah putih aya guha damelan nu jerona 5 meter teras saurna oge kapungkurna pernah dijantenkeun salaku tambang belerang. Mun kaleresan ngalangkungan eta guha pasti bakalan ngangseu bau belerang nu nyengat pisan, kumargi kandungan belerangna kasebat tinggi, di jaman baheula (kapungkur) sempet diwangun pabrik belerang nu namina Zwavel Ontgining Kawah Putih.

Ayana Kawah putih eta akibat bituna Gunung Patuha nu kajadianna di abad ka 10 – 12. Salain kawah putih oge aya kawah lainna nyaeta Kawah Saat. Diditu aya kios-kios nu ngical rupa-rupa cinderamata nu tiasa dijantenkeun oleh-oleh. Salain eta oge seueur padagang nu ngical buah khas Ciwidey, tos teu bireuk deui yaeta Strawberry tea.

Kacida lebarna mun amengan ka Ciwidey teu sindang ka Kawah Putih, tangtuna bakal ngaliwatkeun tempat nu tiasa nunjukeun nuansa alam nu endah pisan. Biasana dina poe pere atanapi pakanci, diditu bakal ninggal seueurna jalmi nu datang ka tempat wisata eta kanggo ngarasakeun hegarna tempat eta, bakatning sae sareng endahna lokasi eta teh. Kaendahan nu digambarkeun bakal ngajantenkeun emut teras salamina Sapertos sim kuring he…

Carana dugi ka tempat Wisata Kawah Putih nu aya kirang langkung di saluhureun 46 km ti kota Bandung tiasa dijugjug ku nganggo kendaraan pribadi atanapi kendaraan umum. Mun nganggo kendaraan umum ge teu kedah ketir, diditu aya angkutan nu tiasa nganteurkeun dugi ka tempat wisata Kawah Putih. Atanapi oge tiasa konvoi nganggo sapeda motor sareng rerencangan.

Upami kaleresan teu acan kaditu, sok atuh mangga engal-engal geura dongkapan, da eta teh mangrupakeun kakayaan urang salaku urang Tatar Pasundan. Siga abdi sok sering waenya! padahalmah hoyongna mah kitu he….

Cag ah, waktosna tos samporet, bade netepan heula bilih teu kabujeng.

Saduran ti seratan Setahun Sudah Berlalu, Kunjunganku ke Kawah Putih .

Sanaos teu aya kakaitan sareng judul ieu blog, rasana mah cosok oge nampilkeun sakedik wae malapahkeun sarana sareng tempat-tempat nu aya di Bandung, contoh salah sahijina nyaeta Kawah Putih nu aya di Ciwidey tea, atawa Situ Patenggang, sareung nu sejenna nu lumayan seueur janten teu tiasa di sebatkeun hiji-hiji. Ke upami kagungan waktod nu nyalse Insya Allah di serat deui.

Sanaos tos di jabarkeun dina website resmina sareng nu lianna, rasana teu aya lepatna oge nya, didieu dibahas sakedik. Pan abdi ge urang Bandung pituin he…. Etang-etang nambihan wacana blog ieu sanaos nu ngaosna teu acan seueur oge malahan teu acan aya penginten he.. deui ah. Mugi-mugi tiasa ngabantos ngalancarkeun abdi nyerat ku Bahasa Sunda.

Tah ieu geuningan gambar Kawah Putih teh, nu kantos ku abdi di datangan sataun kepengker. Tepatna aya di daerah Bandung kidul – Ciwidey, Gunung Patuha teh. Tempat nu aya kirang langkung 2300 Meter saluhureun laut, dikiduleun kota Bandung, nyimpan hiji misteri dijaman buhun. Masyarakat nganggap Gunung Patuha teh mangrupakeun kawasan nu angker pikaseremeun, anjeunna nganggap puncak Gunung Patuha kapungkur mangrupakeun tempat panggih sarengna para luluhur Bandung Kidul. Tapi, misteri nu tos janten turun-temurun eta ngawitan sirna saatos kaungkap ku pangelmu Belanda paranakan Jerman, Dr. Franz Wilhelm Junghun, oge pangusaha kebon Belanda nu deudeuh kana kalestarian alam di tahun 1837. Kayaan lamping Gunung Patuha waktos harita masih mangrupakeun leuweung geledegan, pinuh ku tatangkalan kai, sepertos rasamala, saninten, huru, samida, sareng nu sejenna.

Kumargi rasa panasaran sareng teu percanteun tea, Junghun teras norobos geledeganna leuweung hutan Gunung Patuha. Akhirna manehna mangihan hiji danau kawah nu katinggal sae pisan. Sanajan tos di panggihan tahun 1837, tapi daerah eta nembe janten objek wisata tahun 1987 saatos dikembangkeun ku PT Perhutani (Persero) Unit III Jabar sareng Banten.

Cag ah… caritana dugi kadie heula, sanes waktos diteraskeun deui.

Unjuk rasa! Sempat beberapa waktu yang lalu melihatberita di televisi mengenai unjuk rasa, ada yang melemparkan batu dan benda lainnya untuk merusak bangunan dll. Rasanya jadi ingin mengulas juga walaupun hanya sebatas pendapat pribadi yang awam.

Saterasna supados gampil ngartosna tiasa di uningaan di dieu.